: حِكايَة لِّي صَاوْبْ شْطْرْنْجْ وْلّ الشَّاهْ مَاتْ

.تَيْعَاوْدُو أنَّه فْإيرَانْ جَا لِّي ٱخْتَرْعْ لعْبَة الشْطْرْنْجْ عْنْد الشّاهْ وْڭالْ لِيه شْحَالْ تْعْطِينِي فِيهَا

!! ڭالْ لِيهْ الشّاه ٱخْثارْ لِّي بْغِيتِي نْعْطِيهْ لِيكْ

: ڭالْ لِيهْ مُولْ الشْطْرْنْجْ

.64 حْطْ لِيَ حْبّة تْالرّوزْ فْالبْقْعَة اللوْلة، وْجُوجْ حْبّاتْ فْالبْقْعَة الثانْيَة وْكُلّ مْرّة ضُوبْلْ لِيَ الحْبَّاتْ حْتّى تُوصْلْ لبْقْعَة

.ڭال لِيهْ الشّاهْ مَشِي مُشْكِلْ، غَادِي نْڭولْ لِيهُمْ يْجْبْدُوهَا لِيكْ مْنْ التّمْوين

: مُولْ التّمْوينْ ضْرْبْ لحْسَابْ وْڭالْ لِيهْ، مَايْمْكْنْشْ وَخَّا نْبِيعُو المَمْلكَة كُلْهَا

.هَادْ التويشيَة تَنْسْمِّيوْهَا فْالرْيَاضِيَاتْ المُتَتالِيَاتْ

.إلَ 30000 حْبّة هِي كِيلو تْالرّوزْ، يْعْنِي الشّاهْ خْصّو يْعْطِي 615  مْليَارْ طُونْ تْالرُّوزْ

!! يْعْنِي 800 عَامْ تْالإنثاجْ العَالمِي تْالرّوزْ تدروكا

:أجِي دَابَا نْشُوفُو الفَائِذة وْلّ الرْبَى

روى الإمام مالك عَنْ زَيْدِ بْنِ أَسْلَمَ أَنَّهُ قَالَ : كَانَ الرِّبَا فِي الْجَاهِلِيَّةِ أَنْ يَكُونَ لِلرَّجُلِ عَلَى الرَّجُلِ الْحَقُّ إِلَى أَجَلٍ

.فَإِذَا حَلَّ الْأَجَلُ قَالَ : أَتَقْضِي أَمْ تُرْبِي ؟ فَإِنْ قَضَى أَخَذَ وَإِلَّا زَادَهُ فِي حَقِّهِ وَأَخَّرَ عَنْهُ فِي الْأَجَلِ

 .عْنْدْنَا جُوجْ تنْوَاعْ تالفائِذة وْلَّ تالرْبَى، الرّبَى العَادي وْ الرْبَى المْرْكّب

: لوَاحْدْ فِينَا تَيْتْسْلفْ لجُوجْ تلحْوَايْجْ

.يَإمَّا خْصُّو لفْلوسْ بَاشْ يْبْدَا شِي بيعَة وْشْرْيَة، وْلّ أيِّ حَاجَة بْحَال يْشري طُمُبيلة وْلّ دَارْ بَاشْ يْرْبْحْ لفْلوسْ

.يَإمَّا مْزيّرْ وْخْصُّو لفْلوسْ بَاشْ يْحْلْ وَاحْدْ المُشْكِلْ

.تصْوّرْ دَابَا تْسْلفْتِي 1000 دْرْهْم مْنْ عْنْدْ عْبّاسْ

.وْڭاليك تْرْجّعْهَا لِيَ مْنْ دَابَا عامْ، وَلكِنْ تْعْطِينِي عْشْرَة فْالمْيَة كُلّ شْهْرْ

: وْبَاشْ نْلقَاوْ شْحَالْ خْصّكْ تْعْطِي لسِّي عْبَّاسْ، غَادِي نْخْدْمُو بْاللعِيبَة تلخَوَارزْمِي الله يْرْحْمُو

: أنَّهُ خْصّكْ تْضْرْبْ المْتْبَايْنِينْ بْعْضِيَّاتْهُمْ وْ تْقْسْمْ عْلى الثالث

. » Intérêts simples « يْعْنِي خْصّْكْ تْعْطِي لسِّي عْبَّاسْ  100 دْرْهْمْ كلّ شْهْرْ، تَتْڭولْ وَاهْ القَاضِيَة مْزْيَانَة

.يْعْنِي مْنْ بْعْدْ عَامْ، خْصّكْ تْعْطِي لسِّي عْبّاسْ 1000 دْرْهْمْ لِّي تَيْتْسَالك وْزيدْ عْلِيهُمْ 1200 دْرْهْمْ تْالفَائِدَة وْلَّ الرْبَى

: يْعْنِي خْصّكْ تْحْطْ لسِّي عْبّاسْ فٱخّرْ العَامْ 2200 دْرْهْمْ

!! دَابَا إلَ دْرْتِي بِيعَة وْشْرْيَة، نڭولُو رْبْحْتِي الضُّوبْلْ مْنْ بْعْدْ عَامْ، يْعْنِي بَاقِي تَيْتْسَالكْ 200 دْرْهْمْ سِّي عْبَّاسْ

( : عَادَتَا سِّي عْبَّاسْ تَيْڭولْ لِيكْ، بْلا مَا تْرْجّعْ لِيَ لفْلوسْ غَادِي نْسْلفْكْ 2200 دْرْهْمْ بْعْشْرَة فْالمْيَة عَاوْتَانِي

. »Intérêts composés » وْمْعَ نْتَا فْرْحَانْ وْرَابْحْ الضُّوبْلْ، تَتْڭولْ القَاضِيَة مْزْيَانَة، وْهْنَا تَيْرْكّبْ لِيكْ الرْبَى

(: بْحَال دّرِّي لِّي مْرْكْبَاهْ مُّو

!! وْبَاشْ تْهْنَّا مْنْ السّلفْ، خَاصّكْ عْل الأقلْ تْرْبْحْ رْبْعَة تلمْرّاتْ دَاكْشِّي لِّي تْسْلفْتِي، يْعْنِي % 400 تالرْبْحْ

.هَادْشِّي إلَ بْغِيتِي تْنْمِّي البِيعَة وْشْرْيَة لِّي دْمْرْتِي عْليهَا عَامْ كامل

: هُوَ فْالحَقيقَة الرْبَى المْرْكّبْ تَيْتّحْسْبْ بْالمُتَتَالِيَاتْ، وَلكِنْ لِّي تَيْهْمْنِي هُوَ نْسْهّلْ لعِيبَة تْالفَائِدَة وْمَاشِي لحْسَابْ بْالضّبْطْ

.أنَا بْسّطْتْ بَاشْ يْبَانْ لنَّاسْ لِّي مَاتَيْعْرْفُوشْ، لأنّهُ هَادْ اللعِيبَة مَاكَتْبَانْشْ حِيثْ تَنْقْللو الفَائِدة وْ تَنْكثرُو السِّنِينْ

وْهْنَا غَادِي يْبَانْ لِيكُمْ للِّبْغَا يْدِيرْ بِيعَة وْشرْيَة ولّ لِّي بْغَا يْشْرِي دَارْ وْلّ طُمُبِيلة مَا رَابْحِينْ، علاش ؟

.حِيت هَادَاكْ لِّي تَيْدِيرْ بِيعَة وْشْرْيَة بَاشْ يْكُونْ حُرْ تَاعْ رَاسُو، وْلّ خْدّامْ عْنْدْ مُولْ السّلفْ

.أمَّا لِّي بَيْشْري دَارْ وْلّ طُمُبِيلة غَادِي يْصْدْقْ شَاِري جُوجْ دْيُورْ، وْحْدَة لِيهْ قْديمَة وْ وْحدَة لمُولْ السّلفْ جْديدَة

.النّاسْ عَادَتًا مَتَيْقَارْنُوشْ دْيُورْ القْدَامْ بْالدْيُورْ الجْدَادْ، لّي تَيْشْريوْ وْ تيْبِيعُو الدْيُورْ تَيْعْرْفُو هَادْ اللعِيبَة

.نْفْسْ اللعِيبَة تْالفَائِذة تَنْلقَاوْهَا فْالكْرَى، وَاحْدْ بْنَادْمْ سْلفْ وَاحْدْ الدّارْ يْعْنِي طْرْفْ تْلفلوسْ تَيْجِيبْ بِيهُمْ فْلوسْ كُلّ شْهْرْ

.وْالحَاجَة الوَاعْرَة أنَّهُ الكْرَى تَيْزيدْ كُلّ عَامْ  وْمُولْ الشِّي تَيْوْهْمْ رَاسُو أنَّ الدّارْ غْلاة حِيثْ قْدَامْتْ دَاكْشِّي عْلاشْ الكْرَى زَادْ

.وْالحَاجَة الوَاعْرَة هُوَ أنّهُ تَتْجي لنَّاسْ عَادِي أنّهُمْ يْخْلصُو القْدِيمْ كثرْ مْنْ الجْدِيد

!! أمَّا لِّي مْزْيّرْ عَادْ تسْلفْ، تنڭولو الله يْحْسْنْ لعْوَانْ

.لمُهِمْ هُوَ أنَّ الفَائِذة وْلّ الرّبَى مْخْبْيَة دِيمَا فْرَاسْ المَالْ لِّي هُوَ دِيمَا صْغْرْ مْنْهَا

: روى الطبري

.إنما كان الربا في الجاهلية في التضعيف

يكون للرجل فضل دين، فيأتيه إذا حل الأجل فيقول له : تقضيني أو تزيدني؟

.فإن لم يكن عنده أضعفه في العام القابل، فإن لم يكن عنده أضعفه أيضًا

.فتكون مئة فيجعلها إلى قابل مئتين، فإن لم يكن عنده جعلها أربعمئة، يضعفها له كل سنة أو يقضيه

.  قال تعالى عز و جل :  يَا أَيُّهَا الَّذِينَ آمَنُوا لَا تَأْكُلُوا الرِّبَا أَضْعَافًا مُضَاعَفَةً وَاتَّقُوا اللَّهَ لَعَلَّكُمْ تُفْلِحُونَ